Verjerapport (tidlegare verjerekneskap) for 2024
Verjer med rapporteringsplikt (tidlegare rekneskapsplikt) skal sende inn verjerapport for dei eigedelane som blir forvalta i sitt eller verjeoppdraga sine til statsforvaltaren.
I 2025 skal du som verje med rapporteringsplikt innan 30. april for kvart verjemål med rapporteringsplikt sende inn:
Fullstendigheitserklæring (årleg erklæring om rekneskap og formuesforvaltning) (GA-8042)
Hugs å:
- hjelpe den du er verje for med skattemeldinga for 2024 før du fyller ut fullstendigheitserklæringa. Informasjon som er relevant for tilgang, utfylling og innsending av skattemeldinga finn du på www.skateetaten.no
- svare på alle punkta, elles blir ikkje fullstendigheitserklæringa godkjend.
- signere med dato og underskrift viss du må sende inn fullstendigheitserklæringa på papir.
Kontoutskrifter
For den perioden du har vore verje mellom 01.01.24 til 31.12.2024 skal du sende kopi av alle månadlege kontoutskrifter for alle kontoar du har disposisjonsrett til i verjemålet.
Hugs at:
- du skal sende inn kontoutskrifter for alle månader du har vore verje i perioden 01.01.24 til 31.12.24, sjølv om det ikkje har vore rørsler på kontoen eller du som verje har brukt kontoen. Alternativt må du leggje fram dokumentasjon frå bank på at det ikkje har vore rørsler på konto.
- kontoutskriftene skal sendast i banken sitt eige format, slik du tek imot det frå bank/hentar frå nettbank. Du kan ikkje kopiere utskriftene til Word, Excel o.l.
- det ikkje er tilstrekkeleg å sende inn transaksjonsoversikt frå konto/nettbank.
- dersom teksten ikkje forklarer kva transaksjonen gjeld, skal du skrive ei forklaring tydeleg på kontoutskrifta. Alle kontantuttak må forklarast. Du kan eventuelt nytte kommentarfeltet i fullstendigheitserklæringa, eller leggje ved forklaring på eige ark. Det er viktig at transaksjonar på kontoutskriftene blir gjorde forståeleg for Statsforvaltaren og revisor, slik at det kjem fram kva midlane er nytta til.
- Vi minner om at verjehavars inntekter skal innbetalast til konto i verjehavars namn, og ikkje til kontoen til verja, bufellesskap, eller andre.
Slik sender du inn dokumentasjonen
Statsforvaltaren føretrekkjer digital innsending, og oppmodar alle verjer til å sende inn verjerapporten via Altinn.
I Altinn fyller du ut skjema for Fullstendighetserklæring (Årleg erklæring om rekneskap og formuesforvaltning) og legg ved aktuelle vedlegg.
Nytt din eigen elektroniske ID ved innsending av verjerapporten og ikkje ID til den du er verje for.
Send inn verjerapport via Altinn først når alle aktuelle dokument og vedlegg ligg føre og nytt korrekt kategori for vedlegga du legg ved.
Mangelfull levering av verjerekneskap innan fristen kan få konsekvensar for vervet ditt som verje.
Annan informasjon
- Ei verje skal som hovudregel ikkje disponere meir enn inntil 248 056 kroner (tilsvarande 2G) på vegner av person med verje. Overskytande skal overførast til ein kapitalkonto som Statsforvaltaren skal forvalte på vegner av personen. For nærmare informasjon om dette kontakt Statsforvaltaren.
- Verjer med rapporteringsplikt, skal oppbevare alle kvitteringar og bilag knytte til verjemålet i minst tre år. Kvitteringar og bilag skal ikkje sendast til Statsforvaltaren.
- Eventuelle søknader om Statsforvaltarens godkjenning, oppmodingar, honorarkrav eller anna, må du sende i separat sending – og ikkje leggje ved verjerapporten.
Dersom du har spørsmål, kan du kontakte statsforvaltaren din.